0
0
ભરૂચ શહેરના વાહનોથી ધમધમતા વિસ્તાર એવા સેવાશ્રમ રોડ ઉપરથી લગ્નનો વરઘોડો નીકળ્યો હતો જેમાં ફૂટેલા ફટાકડાના તણખાથી કલરના ગોડાઉનમાં આગ ફાટી નીકળતા કોમ્પલેક્સમાં રહેલા લોકોના જીવ તાળવે ચોંટી ગયા હતા. આગ ઉપર કાબુ મેળવવા માટે ભરૂચ નગરપાલિકાના ફાયર ફાયટરોએ પોતાનો જીવ જોખમમાં મુકીને આગ ઉપર કાબુ મેળવવાના પ્રયાસો કર્યા હતા.ભરૂચ શહેરના સેવાશ્રમ રોડ ઉપર આવેલ સુર્યા શોપિંગ સેન્ટર પાસેથી લગ્નનો વરઘોડો પસાર થઈ રહ્યો હતો તે દરમિયાન લગ્નના વરઘોડામાં આતશબાજી અને ફટાકડા ફોડવામાં આવી રહ્યા હતા. તે સમયે ફટાકડાનો એક તણખો કોમ્પ્લેકસના ત્રીજા માળે કલરના ગોડાઉનમાં પડતાં આગ ભડકી ઉઠી હતી. પળવારમાં આગે વિકરાળ સ્વરૂપ ધારણ કરતા કોમ્પ્લેક્સમાં રહેલા લોકોએ કલરના ગોડાઉનમાં નીકળતા ધુમાડા જોઈ સાવચેતીના ભાગરૂપે શોપિંગની બહાર નીકળી ગયા હતા અને તાબડતોબ ભરૂચ નગરપાલિકાના ફાયરબ્રિગેડને જાણ કરવામાં આવતા લાશ્કરો દોડી આવ્યા હતા.જો કે પ્રવેશવાનો કોઈ રસ્તો ન હોવાના કારણે જીવના જોખમે પણ ભરૂચ નગરપાલિકાના ફાયર ફાયટરો આગના ગોડાઉનમાં પ્રવેશ્યા હતા અને દરવાજા તોડવાની પણ ફરજ પડી હતી.આગે વિકરાળ સ્વરૂપ ધારણ કરતા ગોડાઉનની બારીના કાચ પણ તોડવા પડયા હતા.ગોડાઉનમાં જ્વલનશીલ પદાર્થ થીનર (ટર્પેન્ટાઈન) અને એશિયન પેન્ટ કલર જેવા જ્વલનશીલ પદાર્થ હોવાથી આગે ભયંકર સ્વરુપ ધારણ કર્યું હતું.છતાં ફાયર બ્રિગેડે જીવના જોખમે આગ લાગેલા માળ ઉપર પહોંચી આગ ઉપર કાબુ મેળવવાના પ્રયાસો કર્યા હતા.ભરૂચના પટેલ વેલફેર હોસ્પીટલના અગ્નિકાંડ બાદ ભરૂચ નગરપાલિકા દ્વારા ફ્લેટ,હોસ્પીટલ,હોટલો સહિત મોટી ઈમારતોમાં ફાયર એનઓસી માટે નોટીસ ફટકારી રહ્યા છે.પરંતુ સેવાશ્રમ રોડ ઉપર ત્રીજા માળ ઉપર કલરના ગોડાઉનમાં આગની ઘટનાથી આજુબાજુમાં રહેતા લોકોના જીવ તાળવે ચોટી ગયા હતા. ત્રીજા માળ ઉપર કલર નું ગોડાઉન અને તેમાં પણ જવલનશીલ પદાર્થ જેવા કે થીનર (ટર્પેન્ટાઈન) અને જ્વલનશીલ કલર ના ગોડાઉનમાં આગ લગતા ફાયર ફાયટરોએ પોતાના જીવના જોખમે પણ ત્રીજા માળે પહોંચી આગ ઉપર કાબુ મેળવ્યો હતો અને ગોડાઉન માટે કોઈપણ જાતની ફાયર એનઓસી ન હોય અને ફાયરના સાધનો પણ ગોડાઉનમાં ઉપલબ્ધ્ધ ન હોવાના કારણે ભરૂચ નગરપાલિકાના ફાયર ઓફિસર ચિરાગદાન ગઢવીએ નોટીસ ફટકારી છે.
