ભરૂચ- રવિવાર – રાજ્ય સરકારની ખેડૂતોને દસ હજાર કરોડની આર્થિક સહાય પેકેજ જાહેરાતને પગલે ભરૂચ જિલ્લાના ખેડૂતોમાં ખુશીની લહેર જોવા મળી છે. ભરૂચના હાંસોટ તાલુકાના કુંડાદરા ગામના 54 વર્ષીય ખેડૂત શ્રી ગેમલસિંહ પી પટેલે જણાવ્યું હતું કે, ચાલુ વર્ષે 6 મહિના સુધી ખૂબ વરસાદ પડ્યો છે. અને ખેડૂતને કમોસમી વરસાદથી મોટું નુકસાન ગયું છે, જેમાં ડાંગર, કપાસ અને મગફળી સહિતને ખૂબ નુકસાન થયું છે, તેની સામે સરકારે સહાય પેકેજ જાહેર કરીને બહુ સારું કર્યું છે. ૧૦ હજાર કરોડનું સહાય પેકેજ ખેડૂતો માટે સારામાં સારું છે. એ બદલ હું રાજ્ય સરકારનો આભાર માનું છું.
